pakasaritaan ti biag...

Iti rabii ket makapakutimermer nga angin nga agampayag iti nawaya a rabaw ti kabaybayan, ngem iti aldaw ti kuminit a pudot ti init.

Iti aglawlaw, baybay laeng ti makitkita... uray sangkatipping la koma a daga ket kasla imposible a masarakan. Iti tangatang, nangruna iti rabii, ti makasalibukag rikna a panagandap dagiti bituen.

Ngem mabisinda, ken mawawda. Ket manipud nabalintuag ti bilog a naglugananda, nakakapetda lattan iti pataw ti payaw a nagpaklebanda... mangnamnama, nga iti ania man nga oras, adda mangisalakan kadakuada.

Makapaturog koma dagiti darakkel a dalluyon a mangin-indayon, wenno musika koma ti angin a mangkomkompaniar nga angin... ngem kasla met batibat ti tunggal idateng.

Maysa a 1.5 a Pepsi ti in-inutenda, nga inumen, tapno iti kasta, bumayag ti panagserbina kadakuada.

Dagiti mangngalap: Rodel Lapena, 27 anios; Roy Rapada, 32 anios; ken Antonio Tadena, Jr. 42 anios, agpapada nga agnanaed iti barangay San Roque, Santiago, Ilocos Sur.

Ti tallo nga aldaw ken dua a rabii a panagkatang-katangda iti tengnga ti kabaybayan, nasurok 10 nautical miles manipud iti takdang iti daya ket kasla agnanayon.

Pimmanawda idi Enero 19, 2012... iti bigat ti sabado, adda da pay laeng ditoy. Ngem pulos a di pay laeng nagkulpa ti namnamada a maisalakanda

Iti panakipatpatang kadagiti assawada a da Jenny Lapena, Remaly Rapada ken Lorna Tadena, agraman ti tatang ni Rodel a ni Rodolfo, agarup alas singko iti parbangon idi Enero 19 nagturong dagitoy iti kabaybayan tapno agkalap.

Ngem iti dayta nga aldaw, Enero 21... dua a mangngalap manipud Dili, Santa Cruz, Ilocos Sur, ti nakasarak kadakuada. Ket nagbiag ti apoy iti pusoda.

Makaawiddan.

Nagluganda iti bilog dagiti manangisalakan a mangngalap, ginuyodda pay ti bilogda a nabalintuag.

Iti interview ti DZTP Radio Tirad Pass kadagiti mangngalap, dinakamatda a gapu iti napigsa nga angin ken darakkel a dalluyon iti tengnga ti taaw ti nakaigapuan iti panakabalintuag ti bilogda.

Gapu iti dayta, nakitada ti maysa a payao, ket ditadan a kimpet ken nagpalipas ti aldaw ken rabii.

Agarup alas onse iti aldaw idi Enero 21 idi naisangpet dagiti mangalap a sinarabu ti pamiliada ken ginasut a kabarangayan nga adda iti igid ti baybay.

Ti dayta a panagawidda, nagtibnok ti ragsak ken sangit, manipud iti asawada, ama ken ina, kakabsat ken kabarangayan a nagtitipon iti igid ti baybay tapno mangsabet iti panagsublida. (Danny Antalan)