pakasaritaan ti biag...

Saanen a nagpakada ni Harold Ramboanga idi pimmanaw iti balayda tapno mapan agkalap iti baybay a sakupen ti baybay Tsina. Narway met ngamin ti kastoy a gannuatna. Agur-uray met kanianan ta Arnold Romero Jr, ken Bermar Etrata.

Agpapadada a mangngalap nga agnanaed iti barangay Gabao, Santiago, Ilocos Sur. 

Nasipnget ti aglawlaw, ngem kabisatadodan ti pangiturongan ti 4 x 4 a bilogda nga Arvin Troy. Maysa pay, ti agsapa ti Abril 5, 2011 ket kas met laeng agsapa kadagiti adun nga agsapa ti baybay a panagkalapda.

Idi nadanonda ti pagliwliwan, medio darakkel ti dalluyon ken adda pigpigsa ti angin. Ngem pinadasda latta ta bareng makaalada iti ikan nga ilakodanto nga isu ti pangbiagda iti pamiliada.

Ngem idi kuan, bigla ti dakkel a dalluyon, ket ti bilog a pagluglugananda ket naiduron iti ayan ti rakit a medio natadem ti ikingna. Nabbutawan ti bilogda. Nagdanagda, ngem masapul a panawanda ti bilog tapno iti kasta, dida mairaman a lumned.

Ngem sakbay a limned ti bilog, winarwarda ti pasaplak ti bilog, inalada ti nylon ti liwliw, agraman ti styrofoam tapno iti kasta, pagsiglotenda. Nagballigida. Ngem idi sumagpatda, saan a mabalin ti tallo  tao, dua laeng ti mabalinna a laonen, ta lumneden. Ngem ni Junior, kasla naawanen ti namnama. Gapuna nga isuna ti nagsalpa iti bilog. Da Harold ken ni Bermar ti nagsinublat a sumagpat. Aginana iti 30 minutos ti maysa tapno maturog ken makaala iti pigsa, kabayatanna nga aglanglangoy ti maysa. No nadanon ti 30 minutos, sumublat met ti maysa. 

Idi madanon ti rabii, nakariknada iti nakaro a bisin, danag, waw ken malagipdan ti pamilia.

Ngem saanda amin ket mabalin nga agtutuon iti dayta a paltaw. Maysa-maysa laeng ti mabalin. Nga isu ti inaramidda. Nagsisinublatanda nga innala tapno makainnana. Ti dadduma, aglanglangoy lattan. Ngem mariknadan ti bisinda.

Kabayatanna, iti daga, madanaganan ti pamiliada. Napalabesen ti maysa nga aldaw, ngem dida pay laeng a simmangpet. Ania ti napasamak kadakuada. Amangan no nalmesda. Ket adda danag iti barukong dagiti mangipatpateg kadakuada.

Kasano met ngamin a di madanagan ti assawada, ti maysa ket masikog, ti maysa ket adda tallo bulanna nga anak, kabayatanna a ti maysa ket tallo ti anakna.

Iti ayan dagiti mangngalap, agtultuloy ti panakayan-anudda. Agpapa-amiananda. Adu ti barko a makitkitada a manglabas-labas kadakuada, ngem awan ti makakita iti yanda.

Ngem idi agangay, idi adda nakitana a bilog. Inlayag ni JR ti orange a badona. Ket nakita isuda nga agkakapsuten iti kaaddada iti baybay.

Anak gayam ti kapitan ti Puro, Magsingal, Ilocos Sur ti nakakita kadakuada. Ket naisalakanda. Anian a yamanda iti maikaddua a biag a naipaay kadakuada.###