a writer's diary... journalist chronicle...

Diak naawanan iti namnama ket nagkarkararagak latta, Manong. Sapay koma ta dagiti pannubok ket tibker ken karit kaniak tapno matan-ok ti balligi.

Manong Danny, nagturposak ngarud iti elementaria a naimula kaniak ti pananglais ken panangparigatda kaniak.

Nagadalak iti first year iti Diffun High School. Ket numan pay agkurkurang ti kuarta a pagadalko, inan-anusak a timultulongak kadagiti dadakkelko. Dagiti dua a manongko ket agbasbasa met iti CNSAT iti Cabarroguis. Wen Manong, sadiayda a nagbasa gapu ta iti DHS ket nabiit pay a naipatakder. Ket iti panagbasada iti CNSAT ket nakisalida iti isports ket nangabakda. Kasta met laeng ti kasinsinko a ni Angelo. Nalaingda iti pole vault ken track and field ken long jump.

Gaputa napadayawan ti pamiliami a Gacusan, simmaliak met tapno iti kasta ket ipakitami ken Ma’am Madronio a saan amin nga ag-Gacusan ket mennel.

Idi nadanon ti district meet iti pagadalanmi, nakisalipak iti track and field. Nangabakak manong. Agingga a nailabanak iti SCUAA, IRAA ken kasta metten iti Palarong Pambansa. Nadanonak iti naduma-duma a probinsia kas koma iti Naga City. Kasta met laeng ni Insan Angelo a nakadanon idiay Iloilo City nga isu ti nakaangayan ti Palarong Pambansa idi 1991.

Nakagun-od ti kasinsinko manong iti Gold, Silver ken bronze medal. Kasta met kaniak manong, adda met nagaw-atko a medalia iti inkami panakiay-ayam.

Naragsakkami, ta naipakitami nga adda kabaelanmi… a saankami a mennel.

Wen Manong Danny, iti isports ti nakapadayawan ti pamiliami a Gacusan iti ilimi a Diffun.

Nagturposak iti high school ket siak ti napadayawanak kas Athlete of the Year. Naragsakanak ken nakasangitak gapu ta malagipko ti pananglais kaniak ni Ma’am Madronio. Iti panakakita kaniak ni Ma’am Madronio ket saan a nakatimek, ket nakunak iti bagik, naamirisna ngatan a saan a mennel dagiti ag-Gacusan.

Wen, Manong Danny, desididoak a siak ti umuna nga ag-Gacusan ditoy ayanmi a makaturpos ti karera, ta didanto ket ibagbaga nga aglaklako laeng iti nateng a kumarkaramot iti daga.

Nadanon manen ti panagbasak iti kolehiyo iti QSC wenno Quirino State College. Nangalaak iti kinapulis. Numan pay dakkel ti magastos, inanusak gapu tam as ad-adayo ti pagadalan, manong.

Inanusak ti narigat a trainingmi gapu ta idi high schoolak ket maysaak a PMT Officer.

Wen manong, agpayso la unay nga adu ti pannubok ken rigat sakbay a naileppasko ti kinapulisko. Ngem gapu ta diak naawanan iti namnama, ket agyamanak kenni Apo Dios ta dinak sininaan ket tinarabaynak agingga a nakaturposak.

Wen, nakagraduarak a kas maysa a pulis. Ket itan manong ket naragsakak, gapu ta agpayso la unay a nagsam-it ti balligi no adda dagiti karit it biag.

Manong Danny, itan ket addan asawak a maysa a maestra, dua ti anakmi. Kanayonko nga ipalpalagip a dinanto aramiden ti manglais kadagiti estudiante.

Ken manong, saan laeng a siak ti nakaturpos kas pulis, pakairamanan pay ti kasinsinko a babai. Ket no ipalubos ti Apo, iti sumarsaruno a tawen, saan laeng a dua no di ket ad-adu pay a-Gacusan ti makaadal.

Ala kastan, Manong Danny, gibusakon toy pakasaritaan ti biagko. Agyamanak met kenni Luz Orpilla a kasinsinko a nangisurat daytoy a pakasaritaan ti biagko.

Kadagiti agdama nga agbasbasa, kangrunaan kadagiti padami a marigrigat, sapay la koma ta saanda mapukawan iti namnama. Agkamatalektayo kenni Apo a Namarsua, dinatayo baybay-an.

Agyamanak unay iti panawenmo a nangbasa daytoy suratko.

Toy Pagayammo
Jerry Gacusan
(Insurat ni Luz Orpilla)