a writer's diary... journalist chronicle...

Wen, manong, iti inkami panagdadanggay a panagkararag, insardengna ti napigsa nga angina ken tudo. Ket idi nagbayag, kimmapsot ket nabang-arankami manong.

Nakunak a pannubok amin ti Dios daydiay, ket intuloymi manen ti nagna gapu ta adayo pay. Dimi sinardayan ti nagkararag agingga a nakadanonkami iti pagtaenganmi.

Nagsangsangit dagiti kakasinsinko, ket gapu iti dayta a napasamak, simmadot dagiti dadduma a nagbasa. Ngem siak, saan manong, mas lalo ketdi nga insaedko ti nagadal.

Iti maysa nga aldaw, diak ninamnama a makitanak ti maysa a subject teacherko iti science nga awaganta iti Ma’am Madronio, a maysa a balasang ken kabarangayak pay.

“Jerry, umayka man ditoy.” Kinunana.

“Apay kadi, Ma’am.”

“Hoy! Saanka man nga aginlalaing ta ammok a saanka a makaadal. Gapu ta dagiti ag-Gacusan ket mennel, awan ammona ken babaero!” Makapleng dagiti balikasna.

“Ma’am, nagsakit met daytan. Apay kadi a kasta la unay ti guram kadakami? Adda kadi basolmi kadakayo? Wen, aminek, ngem saan amin ket kasta. Ket ipakitakto dayta ma’am—laglagipem ti kunak!”

Wen, Manong Danny, saankon a naigawid ti ngiwatko a naisungbat. Nagsakit ti nakemko iti kasdiay nga insaona.

Insaedko ti nagadal ta ipakitak kenkuana ti kabaelak. Ta uray saankami nga agon-honor ket saan nga amin ket dambel wenno kuneng a kas kinunana.

Iti daydiay a malem, Manong Danny, diak nakaitugot iti pagdalusmi iti garden iti subjectmi nga agriculture. Idi sumrekkak iti roommi, nagdanagak ta sigurado nga agunget ni Maestro Olivar a maestromi. Naistrikto ken naunget isuna. Idi damagenna no sino ti awan ti intugotna, inngatok ti imak. Limakami ngata nga awan naitugotna.

“Umaykayo ditoy sango!” Kinunana.

Napankami ngarud ket pinaruarna dagiti adda intugotna.

“Makitayo kadi dayta bigao nga adda bukel ti balatongna, ken makitayo kadi dayta ladawan ni Congressman Cua a nakakatawa.!”

“Wen sir,” kinunami Manong.

“Agparintumengkayo dita agingga a malpas ti orastayo ditoy.”

Manong Danny, awan asi ni Mr. Olivar kadakami. Naulpit a nangdusa ket binantayannakami iti agmaysa nga oras a nakaparintumeng.

Nagsangit kami a lima. Gapu ta nasakit ti tumengmi.

padaanan ti gibusna...