a writer's diary... journalist chronicle...

Naglabas ti aldaw, bulan ken tawen, addaakon iti maikainnem a tukad iti elementaria. Ditoy a dimteng ti maysa a bagyo, dimi napakpakadaan ket napigsa ti angina ken tudo. Nagdanagak manong, sigurado ti kinapigsana ket nalapunosen ti rangtay a madalananmi.

Wen, Manong Danny, adda ti karayan ken irigasion a lasatenmi. Nakasangitak manong, gapu ta saankami a makaawid iti pagtaenganmi. Manong, inkarkararagko ti ikakapsutna koma.

Idi kimapsut ti tudo, kinasaritak ngarud ti adviserko a ni Ma’am Soriano:

“Ma’am, pangaasim, palubosandakamin nga agawid, tatta a kimmapsuten ti tudo ta bareng saan pay a nalapunos ti rangtay.”

Naassian ngarud ti adviserko ket pinalubosannakami nga agkakasinsin. Idi makadanonkami iti rangtay, nasdaawkami gapu ta dimi metten makita ti rangtay. Uraykami la a nakasangit nga agkakasinsin ta dikamin a makalasat iti rangtay. Nagkararagkami ngarud:

“Diosko, isurom ti aramidenmi no kasano kami a makalasat ken makaawid iti pagtaenganmi. Sigurado a madandanaganen dagiti nagannakmi.”

Idi di nagbayag, napanunotko a manglikawkami idiay Cajel. Wen Manong Danny, adda met laeng rangtay a malasatanmi ngem nangatngato ti rangtayna. Medio mumalemen idi Manong, ngem inanusanmi ti nagna. Ket idi addakamin iti rangtay iti Cajel, pudno a saan a nalapunos ti rangtay ket naragsakankami. Ngem anian, ta idi addakamin iti tengnga ket nagangin ket nagtudo ti napigsa ket nagkul-obkami ket nagkararagkami manen.

MAKALASATDA NGATA ITI RANGTAY... PADAANAN