a writer's diary... journalist chronicle...

Dear Manong Danny

Sakbay iti amin, alaek man pay daytoy a gundaway nga agyaman kadagiti naayat nga agdengdengeg iti programam nga Indayon ni Lagip, nga imatmatonam, Manong Danny. Adtoyak manen a nangsurat iti maysa a pakasaritaan ti naibilang kadakami a balligi iti biag. Awagan ta amin iti naganna a Jerry Gacusan, isuna ket first cousinko ken agnaed idiay Quirino Province.
Ket inta man ngarud duktalen no kasano a naragpatna ti panagballigi, a kas iti panangisalaysaynan.
Manong Danny, sublianta man idi agtawen iti pito. Inserrek ni nanangko iti umuna a grado ti elementaria iti pagadalan idiay Diffun Central School. Naragsakak numan pay adayo ti innak pagnaen, gapu ta no kadakami nga ubbing ket agmaysa nga oras a dalanenmi sakbay a makadanonkami iti pagadalan.
Narigat laeng ti panagbiagmi, Manong Danny, ket dayta ti maysa a karit kaniak ta kayatko a makalung-aw iti kinarigat. Manong Danny, inan-anusak ti magmagna iti maysa nga oras. Kadagiti a panawen ket saan a makadanon ti lugan ta saan a napintas ti dalanmi—nangruna no panagtutudo. Lubnak ken pitak-pitak ti sakami ken agsaka-sakakami payen no kasdiay a panagtutudo.
Wen Manong, gapu iti kinaadayona, agbalonkami ket no aldawen ket mapankami nga agkakasinsin iti likudan ti pagadalan ket agiinuraykami nga agsasango a mangaldaw. Tunggal maysa ket mangiruar iti pagbalunan a naginakkab a pinggan a nabalkot ti panio ket naragsak kami gapu ta agpipinadawatkami iti sidaen. Adda ti nagbalin ti tuyo, itlog, sardines ken adda pay baggoong a nagisar. Wen Manong Danny, uray kasdiay nga uyawenda kami no dadduma dagiti kaadalanmi ngem naragsakkami latta.
Saanko a dinengngeg dagidiay a pananglaisda gapu ta agpayso met a marigrigatkami laeng, kumarkaramot iti daga. Pasaray awan ti balonenmi a kuarta ket inan-anusanmi ti mapan agbasa gapu ta kayatko ti makaadal tapno saanto mapadasan ti agbalin a pamiliak ti kinarigat.
No dumteng ti aldaw ti Sabado, inak tulongan ta Nanang ken Tatang nga agpuros kadagiti nateng a mulami. Ket no kasdiay a dimi kabaelan nga awiten iti kinaaduna, mapanko ipako diay patoke ti nuangmi ket innak to met sakayan ket itulodko iti palengke.
Pasarayko a kadduaen nga aglako ni Nanang ket adda dagiti makakita kaniak a kaadalak ket dita a katkatawaandak ken lalaisendak. Saanko nga ibain Manong ket bay-ak lattan isuda no kasdiay nga uyawendak.
PADAANAN TI TULOY...