a writer's diary... journalist chronicle...

Tunggal tao nga adda ditoy rabaw iti daga ket adda pakasaritaanna:
naragsak, naliday, nasuot, panakigasanggasat...
Adda dagiti agbibiag iti leddaang,
adda met dagiti namuli iti ragsak.
Daytoy ti gapu no apay ti programa iti radio,
Sika Ken Ti Napalabas...
Itay nabiit, naisayangkat ti pasalip iti radio
DZTP Radio Tirad Pass iti Candon City,
ket ti nagbalin a tema, ket
Pakasaritaan iti panagballigi..

Naballigi ti naaramid a pasalip, adu met dagiti nakisalip:
da Dr. Jaime Raras ken Pastor Rodgerry Rodriguez ti nagbalin a hurado
siak ti maikatlo.

Dagiti nangabak:
Umuna a gungona: Sherly dela Cruz Manzano, Balingaoan, Candon City- pakasaritaan ti maysa nga Overseas Filipino Worker idiay Singapore. Naparigat, nasuot iti adu a pannubok. Ti kangrunaan laengen a gagemna, ket makaawid ditoy Filipinas tapno maarakup manen ti dua nga anakna ken ti asawana. Naglibas. Nakaawid. Nagdedennada manen a sangapamilia. Agingga kadagitoy a gundaway, adda pay laeng ti dakkel a piglat iti likud ken imana. Kas pammaneknek, imetna pay laeng dagiti ladawan ti batibat ti biagna idiay Singapore manipud iti employerna. Ngem iti rigatna, awan man laeng ti naited kaniana a damages iti napasamak kenkuana. Awan man laeng ti assistance manipud iti OWWA tapno daytoy napasamakna ket maaddaan iti husitisia.
Maikaddua a Gungona: Luz Orpilla, Lopez, Banayoyo, Ilocos Sur- pakasaritaan ti kasinsinna. Iti panagbasada iti elementaria ket magmagnada iti maysa nga oras iti kapitakan no panagtutudo tapno laeng makaadal. Inuyaw ti teacherda ta namennel kano ti pamiliada, gapuna a saanto kano nga agballigi. Ngem impakitana ti determinasionna ket dita a naggraduar iti criminology. Itan ket maysa a pulis.
Maikatlo a gungona: Romeo Licudine, Pattiqui Santa Cruz, Ilocos Sur - Pakasaritaan ti agama a pinanawan ti ina gapu iti lalaki. Iti kinarigat ti panagbiagda, panagtalon laeng ti nakaigameran ti panagsapulda. Inan-anusanda. Ngem dimteng ti gasat iti anakna, idi a ti tatangna ket batchna gayam ni sigud nga AFP Chief of Staff Villanueva, a taga Tagudin. Naiserrek kas guardia iti barko. Agingga a nakastrek iti maysa a cruise ship a para kadagiti nababaknang ken addaan iti makunkuna iti biag iti sangalubongan. Naminpinsan a naglupos ti panagbiagda.
Maikapat a gungona: Artemio Cortez, Nangalisan, Santa Lucia, Ilocos Sur -Saanna a pakasaritaan ti sinurat, no di ket pakasaritaan ti gayyemna. Maysa a bikolano, ti pakasaritaan ti maysa nga ama ken asawa a mangay-ayat unay iti pamilia, nga aramidenna amin tapno maparagsak ti binangonna a pundasion. Naisalaysay no kasano ti panangipategna iti asawana ken anakna. Agingga a nagawid ta kayatnan a makita ida.
Maikalima a gungona - Pablito Alcantara, Allangigan 1st, Candon City - Maysa a love story, napagsina ti panawen gapu ta napan iti ballasiw taaw ti nobiana. Naawananda iti komunikasion gapu iti sumagmamano a situasion. Ngem iti ud-udina, dita a nagsarakda iti di ninamnama a situasion, ket dita a naituloy manen ti ayan-ayatda.

Dagiti Sponsor:
Umuna a Gungona: P1,000: Reynald Antonio, Alaska, USA
Maikaddua a Gungona: P800: Mr. Rey Patao: Maui, Hawaii
Maikatlo a Gungona: P500: Ms. Arlane Manzano: Vancouver, Canada
Maikatlo a Gungona: P300: SBM George Balmaceda: San Esteban, Ilocos Sur
Maikalima a Gungona: P200: SBM George Balmaceda